KL
DA
EN

2013-mi kapisilinniarnerup aallartinnissaa

Aalisarnermut, Piniarnermut Nunalerinermullu Naalakkersuisoqarfik matumuuna nalunaaruteqassaaq KNAPK-mi isumaqatigiissut malillugu kapisilinniarnissaq pingasunngornermi 1. august 2013 ammaanneqassammat unitsinneqassalluni pingasunngornermi 31. oktober 2013. Kapisilinniarneq piffissami tassani aalajangersimasumi taamaallaat ingerlanneqassaaq.

 

Ukiuni siuliinni piumasaqaataasimasut assigalugit 2013-imi kapisilinniarneq ingerlanneqassaaq, tassalu nammineq atugassanik, inuussutissarsiutigalugulu aalisartut kalaalimineerniarfinnut, napparsimavinnut, akunnittarfinnut, neriniartarfinnut il.il tuniniaasinnaanngorlugit aalisarneq 2013-mi ingerlanneqassaaq. Ukiup siulia assigalugu tunisassiorfinnut 35 tons-inik tunisisoqarsinnaannissaa aalajangiunneqarportaaq. Kapisiliiniarneq nunatsinni namminermi tuniniarneqartussaanarnik ingerlatsiviussaaq, taamaasillunilu nunatta avataanut tunisassiortoqarsinnaasanani. 

 

Pisanik tuniserusuttoqassaguni pisariaqarpoq kapisilinniarnissamut akuersissummik peqarnissaq. Kommunemut saaffiginninnikkut tassunga aalisarnissamut akuersissummik qinnuteqaat immersugassaq pineqarsinnaavoq. Immersugassaq immersorneqareerpat kommunip Aalisarnermut, Piniarnermut Nunalerinermullu Naalakkersuisoqarfimmut nassiutissavaa, tamatumalu kingorna qinnuteqartumut akuersissut nassiunneqassaaq. Kapisilinnut aalisarnissamut akuersissummut tunngatillugu akiliuteqartoqassanngilaq.

 

Nammineq atugassatut aammalu tunisassatut pisat tamarmik, tassalu kapisillit tunineqarsimasut tamarmik  Kalaallit Nunaanni Aalisarsinnaanissamut Akuersissutinik Nakkutilliisoqarfimmut nalunaarutigineqassapput. Nalunaaruteqartarnermut immersugassaq nutartigaasoq ullutsinnut naleqqussagaq akuersissummut ilanngullu nassiunneqassaaq. Immersugassaq ukunani pissarsiarineqarsinnaavoq: http://dk.vintage.nanoq.gl/Emner/Erhverv/Erhvervsomraader/Fiskeri/Fiskeriafdelingen/~/media/nanoq/DFFL/Departementet/Lovgivning/Bekendtgoerelser/Fiskeri/FINAL_%20bilag%20_bekendtgørelse%20om%20fiskeri%20efter%20laks.ashx

 

Kapisilinniarneq pillugu aalajangersakkat erseqqinnerusut Kapisilinniarneq pillugu Namminersorlutik Oqartussat nalunaarutaanni nr. 12-imi august 2012-meersumi takuneqarsinnaapput. Annertunerusumik paasisaqarusuttoqaruni Kristina Guldbæk, tlf. 34 53 29.-mut sinaerluni saaffiginninnikkut pissarsiarineqarsinnaapput

To top