KL
DA
EN

KNAPK oqarpoq nunami allamiunik sulisoqalersinnaaneq ammaffigineqarli

Nunatsinnut soqutigisat pingaarnersarisariaqarpaat nunarsuarmiut unammilleqatigiinneranni pitsaanerpaamik inissisimanissaq. Sulisartut naammattut nunatsinneersuut pissarsiarinissaat naammassisinnaanngikkalllartillutigu Nunarput unammilleqatigiinnermi sanngiiiffeqartuassaaq, taamalu Nunatsinni aalisarnermik inuussutissarsiorneq akunnakusoortumik ingerlajuarallassaaq. 

Naalakkersuisut siulii IA´kkunnit siuttuuffigineqartut maannalu Naalakkersuisuusut naalakkersuinikkut kissaateqarput, pisuussutit uumassusillit atorneqarnerat ullumikkornit pitsaanerungaartumik atorluarneqassasut. Kisia tamanna qanoq ilillugu anguneqarsinnaavaa, sulisunik aalakkaanerusunik peqarnissaq naammassisinnaanngikkutsiguluunnit? Tamatumunnga atatillugu maluginiarneqassaaq, soorngunami KNAPK isumaqarmat, sulisussanik atorfinitsitiniarnermi nunaqavissut salliutinneqassammata, taamaattumik KNAPK´p uani oqariartuutaa unaavoq; sulisuussanik Nunatsinni nassaarniarneq ajornarpat taava nunanit allaneersunik aallertoqartassasoq aatsaat.   

Ukiut ingerlanerini KNAPK arlaleriarluni nunatta avataani angalaartarpoq, angalanerni takusaannarparput aalisakkanik nioqqutissiorneq qanoq ingerlanneqartoq. Ilumoortoq unaavoq, nunani sanilliuffigitikkusuttakkatsinni aalisakkerisut Europap kangianeerajuttuummata aammalu Asiameerajullutik. Tamanna aamma atuuppoq soorlu Royal Greenland´p Tysklandimi fabrikkiini imaluunniimi Islandimi aalisakkerivinni, tappavanimi sulisartut Poleniminngaaneerajupput  Aasiamiinngikkaangamik. 

Malugeqqussavarput nunami allamiunik akissaatikinnerusitsineq (social dumping) taakkunani  atuutinngimmat, naagga nunani pineqartuni sulisartunut isumaqatigiissutit malilluinnarlugit sulineq ingerlanneqartarpoq. Uani pingaarnerpaavoq nioqqutissiortut naammattunik sulisoqarnissaat, taamaalilluni sulineq naammassisarfiulluartumik uneqattaartumillu pigani ingerlasinnaaqqullugu. Sulineq uneqattaanngitsoq aamma isumaqarpoq aalisartut ataavartumik pisaminnik tunitsivissaqartuarnerat.

Taamaattumik KNAPK´p Naalakkersuisut kajumissaassavai nunanit allameersunik sulisartunik aallersinnaanerup ammarneqarsinnaanera nalilersoqqullugu, taamaaliortoqarpammi nunatsinni nioqqutissiorfiit nunani allani nioqqutissiorfiit naligiinnerusumik unammillersinnaassammatigit.

 

Kalaallit Nunaanni Aalisartut Piniartullu Kattuffiat sinnerlugu

Ikinngutinnersumik inuulluaqqusillunga /Med venlig hilsen

Leif Fontaine, siulittaasoq / formand

To top