KL
DA
EN

Qaasuitsup Kommuniani Borgmesterip Jens Svane-p tunitsiviit qaleralittassinne-qarnissaannik oqaaseqaataa pillugu.

Qineqqusaarneq tunngavissaqanngitsoq - Oqarluartaarnerinnaq:

Qaasuitsup Kommuniani Aqutsisut Siulittaasuata Jens Svane-p qaleraleqarfimmiuunini pissutigalugu pisussaaffigilluinnaraluarpaa paasereersimassallugu, assaap illuatungaaniit illuatungaanut nuussineq ikerinnarmiit tiguneqarsinnaanngitsoq.

Kvoteandele-sut agguagaapput ukiumullu pisassiissutigineqartarlutik:

Qaleralittassiissutit tamakkiisumik pisassiissutiniit angallataatilinnut pisassiissutiniit pisassatut %-tinngorlugit aningaasatut nalilittut akuersissutikkaarlugit angallatinik piginnittunut ukioq manna 01. juli 2012 atuutilersumik agguaanneqareernikuupput. Taamatuttaaq aamma umiatsiaararsorlutik qaleralinniat, tamakkiisumik pisassiissutiniit ataatsimoorullugit pisassaannik agguaassiffigineqareerlutik.

Qaleralittassanik ikerinnarmiit tigusisoqarsinnaanngilaq!

Pisassiissutit ikerinnarmiit tigusinnaannginnakkit,tamakkiisumit pisassiissutiniit angallataatilinnut aammalu umiatsiaararsortunut agguaanneqareernikuniit arsaarinnissutitut isikkulerlugit tigusariaqassavatit.

Jens Svane qaleralinniat tikivillugit inissisimanerpit paasitereersimassagaluarpaatsit qanoq umiatsiaa-rarsortunit qaleralittassiissutit amigarineqartigisut. Taava kikkunniit tigussagakkit?

Qineqqusaarneq tummarfissaqanngivissoq:

Kommunimi aqutsisut siulittaasuata Jens Svane-p, qaleralittassanut tamakkiisumik pisassiissutiniit ukiumut pisassiissutit sumut tamaanga qineqqusaarutigalugit pisassiisoqartalernissaanik oqalunnera nateqanngitsumi tunngavissaqanngilluinnartumiippoq!

Aalisartut aalisassapput - Tunisassiortullu tunisassiussapput:

Aalisakkat suugaluartulluunniit aalisartuniit tulaanneqartut atorlugit nunami tunisassiorfiit ingerlassapput. Tunisassiorfiit pisassinneqartalernerisigut aalisartut inuussutissarsiutaannik annikilliartortinneqareeqisumik suli ajornerulersitsiinnassaaq.

 

Inussiarnersumik inuulluaqqusillunga

Kalaallit Nunaanni Aalisartut Piniartullu Kattuffiat

Sinnerlugu

 

Petrus H. Biilmann

Pisortaaneq

Qaasuitsup kommuneanut allakkat