KL
DA
EN

Qaleralinniarneq pillugu paasititsiniaaneq

Matumuuna Kalallit Nunaanni Aalisartut Piniartullu Katuffiata KNAPK-p ilaasortani immikkoortortaqarfiit qaleraleqarfinneersut sinnerlugit Naalakkersuisunut nalunaarutigissavaa qaleralik pillugu inuiaqatigiinnut ussassaarutitut illuinnaasiortumik paasisitsiniutigineqartoq akuersaarsinnaanagu.

Siullermik KNAPK-mi isumaqarluinnarpugut inuiaqatigiit ulluinnarni inuuniarnikkut inuussutissarsiornikkullu sunniuteqartumik atugaannik allannguniartoqatillugu susassaqaqatigiit paaseqatigalugit suleqatigalugillu qulaani pineqartutut aaqqissuussinerit ingerlanneqartariaqartut. KNAPK-milu isumaqarpugut apeqqutit taamaattut pineqartillugit innuttaasut atuisullu oqartussaaqataanerat avaqqunneqarsinnaanngitsoq.

KNAPK-miit aalisartut sinnerlugit erseqqissaatigissavarput qaleralinniarluni aalisarnermi inatsisitigut malitassaritaasut ataqqilluinnarlugit aalisartut aalisarmata, pingaartumilu qalerallit tunisassiarineqarneranni angissusissaannik inatsisigut aaliangersaaneq aalisartut ataqqilluinnarmassuk. Tamatumani Naalakkersuisunut innersuussutigaarput Aalisarnermi saniatigut pisat pillugit Namminersorlutik Oqartussat nalunaarutaanni nr. 28, 11. december 2008-meersumi §3.-mi allassimasoq: ”Mikinerpaaffissatut uuttuut (sigguata nuuaniit paperuata nuuanut uuttortarneqartoq)..qaleralinnut 42 cm-eriulluni..”

Ilanngullugu erseqqissartariaqarpoq sinerissap qanittuani aalisarnermi ningittagarsorneq annertunerpaamik atorneqarmat. Taamatut sinerissap qanittuani aalisariaaseqarnerup pinngortitap allanngutsaalioneranik mianerineqarneranillu tunngaveqarnera aalisartut ataqqillugulu tulluusimaarutigaat.

Nunatta avataani qalorsuarsorluni qaleralinniarnermut tamanna sanilliukkaanni taamatut naliliisoqarsinnaanngilaq, ilisimaneqarmammi immap naqqanik kiligartuilluni aalisarnermi immap naqqa aserortinneqartarmat uumassusillit assigiinngitsut piunerannik allanguinermik kinguneqartumik.

Minnerunngitsumillu taamatut avataani aalisariaaseqarnermi qaleraleerarpassuit pisarineqartarput. KNAPK-milu ilisimaarilluinnarparput    tamakku avataani aammalu nunami suliffissuarmi tunisassiarineqartartut.
Naggataatigut pissutsit qulaani eqqartorneqartut equngasutut taaneqartariaqartut pineqartorlu pillugu ilumoortumik ”assilissamik” takutitsinngitsut tunngavigalugit Naalakkersuisunut KNAPK-miit piumasaraarput KNR-radio aammalu TV aqqutigalugu qaleralik pillugu Namminersorlutik Oqartussat ussassaarutitut paasisitsiniutaat piaarnerpaamik unitsikkallaqqullugu, nutaamik pissusiviusunillu illuinnaasiortuunngitsumik aallaaveqartumik susassaqartut tamarmik akuerseqataaffigisaannik tunngaveqartumik ussassaarutitut paasisitsissussiornissap tungaanut.

KNAPK sinnerlugu

Ikinngutinnersumik inuulluaqqusillunga

Leif Fontaine, siulittaasoq.

To top