KL
DA
EN

Qalerallit pillugit Upernavimmi isumasioqatigiinneq

Aalisartut Upernavimmeersut Upernaviullu nunaqarfiineersut peqataasoralugit ippassaq 26. februar 2014-imi qalerallit pillugit isumasioqatigiittoqarpoq.

Qalerallit pillugit ukiuni kingullerni isumasioqatigiinnerit pingajuat KNAPK-mit aaqqissuunneqarpoq tamatumuuna Upernavik Seafood suleqatigalugu. Naapeqatigiinnermi nungusaataanngitsumik pitsaasumillu aalisarneq qitiutinneqarput, aammalu naapeqatigiinneq aalisartut, uumasorsiuut, allaffissornikkut ingerlatsisut kiisalu tunisassiorfiit akornanni  paaseqatigiittoqarnissaanik periarfissiinernik oqaloqatigiinnermillu siunertaqarpoq. Qinikkanik arlariinnik aamma najuuttoqarpoq.

Ulloq pissangarnartumik ingerlanneqarpoq, matumani Pinngortitaleriffimmiit, Aalisarnermut, Piniarnermut Nunalerinermullu Naalakkersuisoqarfimmiit kiisalu aaqqissuisuniit saqummiisoqarluni. Ilaatigut Upernaviup eqqaani qaleraleqassutsip ineriartornera, sinerissap qanittuani aalisarnerup pisortaqarfitsigut ingerlanneqarnera, aalisartunik siunnersuisarneq aammalu MSC-ip malittarisassai saqqummiunneqarput.

Ulloqeqqasioreernerup kingorna sumiiffiit aalisarfiusartut nunap assinganut aalisartuniit nalunaarsorneqarput aalisartullu misilittakkaminnik isummersoqatigiillutik. Minnerunngitsumik  pingaaruteqanngitsuunngilaq maanna aalisarfigineqarneq ajortut aamma nalunaarsorneqarmata, taakkumi siunissaq eqqarsaatigalugu pisassat qaffanneqarsinnaanerannut pingaaruteqarmata.

Tunisassiassaq pisisartunut Europamiuusinnaasunut Asiamiuusinnaasunullu apuunnissaata tungaanut pitsaasuutittuarumallugu qajassuartumik tunisassiarineqarnissaa pingaaruteqarluinnartuusoq tunisassiorfinnit erseqqissaatigineqarpoq. Qajassuartumimmi tunisassiarineqanngippat akia appassaaq iluanaaruteqarfiunngitsumillu tunisassiarineqassalluni.

Seminaarerneq aalisartut eqimattakkaarlutik sulinerannik (workshop) naggaserneqarpoq. Ilaatigut oqaluuserineqarput; aalisagaqassutsip ineriartornera, ukiuni marlunni-tallimani tulliuttuni aalisarnerup takorloornera, piujuartitsineq, pitsaassuseq aamma nioqqutissiorfinni sulisoqarniarneq. Eqimattat   periusissanik pitsanngoriartitsisinnaasunillu saqqummiisinneqarput. Isummat ilai makkuupput: 

  • Aalisagaqassuseq aalaakkaavoq aalisakkallu ikiliartornerannut takussutissaqarani
  • Pisassiissutigineqartartut annertusineqartariaqarput qerititsiviillu allineqarlutik
  • Sumiiffiit ilaanni talittarfeqarneq aaqqiivigineqartariaqarpoq, kran-itigullu aamma siuarsaasoqarluni
  • Aalisakkat allat (saarulliit, qeeqqat il.il.) tunineqarsinnaalernissaat suliniutigineqartariaqarpoq
  • Piujuartitsineq ingasattajaaraluni paasisariaqanngilaq, pinngortitap nammineerluni piujuartitsinermik illersuisarnera paasineqartariaqarpoq
  • Pitsaanerusumik tunisassiassanik passussineq angallatini anginerusuni qularnaanneruvoq
  • Tunisassiorfiit sulisussaaleqisarnerat iliuuseqarneruffigisariaqarpoq
  • Upernaviup eqqaani qalerallit suffinerisa nalaani qalerallit suallit sulilu sualaallit imaappoq suffeqqammersut - aalisartunit naammattoorneqakkajuttarput, soorngunami aamma immussui kuuttut
  • Uumasut nerisareqatigiinnerat peqassutsimut pingaaruteqarluinnartoq oqariartuutaavoq. Eqalussuit assut qaleralittortuupput, taamatut ipput aamma qilalukkat.

Annertunerusumik paasisaqarusukkuit:

Aalisartoq Hans Bidstrup tel. 591217        KNAPK Tønnes Berthelsen, tel 558989

Upernavik Seafood Flemming Andersen, 961374

To top