KL
DA
EN

Tassa namminersortunngorsaaneq ?

2009-mi Inatsisartunut Partiit qineqqusaarutaat kingumut qimerlooraanni takuneqarsinnaavoq, maanna naalakkersuisuutitaqartut IA, Demokraatit aamma Kattusseqatigiit, pinngitsoqaratik qineqqusaarutigimmassuk – taamanikkut – Namminersornerullutik Oqartussat nioqqutissiorluni inuutissarsiornermi pigisaat namminersortunngorsarneqarnissaat sulissutigineqassasoq. Partiit maanna illua-tungiliuttuusut aamma allaassuteqaratik taamatulli qineqqusaarmata aamma eqqaamaneqassaaq.

Qeqertaq Fish aallartinneqarpoq 2000-mi, taamanikkut inuit Qeqertamit aallaavillit Qeqertami fabrikki Royal Greenlandimit ingerlanneqarumanngitsoq, pisiarimmassuk (1) koruunilerlugu.

Ukiuni qulini Qeqertarsuup tunuani qaleralinnik nioqqutissiortut angisuut marluinnaagaluarlutik, Royal Greenland aamma Qeqertaq Fish, ukioq 2010 Ilulissani Halibut  Greenland tigoqqaalluni aallartippoq, suliffeqarfillu taanna ilaatigut aalisartunit pigineqarilluni. Halibutimi piginneqataassutit affai sinnerlugit aalisartunit pigineqartut ilisimavarput.

Taamatut suliffeqarfiit pingasut unamminerisa kingunerivaa qalerallit akiisa malunnaatilimmik qaffariarneri. Gemba Seafood Consulting 2012-mi misissuinerata takutippaa, qalerallit akii Qeqertarsuup Tunuani imatut ineriartortut:

2009; kr. 7,69,     2010; kr. 8,12    2011; ca. kr. 20 (bonus ilanngullugu)   2012; ca. 21 kr. (inkl.bonus)     

Tassunga sanilliullugu Uummannami annerusumik unammillerfiunngitsumi akit ullumikkut agguaqatigiissillugu annertussuseqarput kr. 10,80 missaani, isumaqatigiissutip nutaap atulerneratigut aki aappaagu KNAPK-imit kr. 12,30 missaaniissangatipparput.

KNAPK isumaqarpoq piginnittut sinnerlugit Naalakkersuisugut nalunaaruteqartariaqartut Royal Greenlandimi ulluinnarni aqutsisut aalajangernerat Qeqertaq Fish-imi piginneqataassutit 58%-it Royalimiit pisiarineqarnerat tapersersorneritsik.

Tapersersorunikku ilisimassavaat unammillerneq millissammat, taamalu akit millerujussuassammata, aalisartullu atugaat ikiorserneqarnavianngimmata. Akit appasissut  kingunerisassaat alla tassaavoq, aalisartut isertitamik appannginnissaat qulakkeerumallugu qaleralinnik suli amerlanerusunik piumalerneri taamalu Naalakkersuisut suli pisassanik qaffaanissanik utikaartunik piumaffigineqartuarneri.  

Maanna Royal Greenlandip inuiaqatigiit aningaasaataannik atuilluni niivernerup inissisimaneranik innarliilernera kinguneqartussaavoq Halibut Greenlandip akitigut unammillerneqarneranik, taannalu unammineq - arlaatigut iliortoqanngippat – ataasiinnarmik inerneqartussaavoq tassalu kina aningaaserivimmik karsikkaanerua? Soorngunami inuiaqatigiit suliffeqarfiutaat akiliisinnaarsinnaajunnaarsinnaangitsoq ajugaassaaq Halibutilu matulluni. 

KNAPK-mit naqissusissavarput kattuffiup kissaatigilluinnarmagu aalisakkanik  nioqqutissiorneq unammilleqatigiinnermik aallaaveqassasoq. Unammileqatigiinnerup ingerlaannarnissaa qulakkeerumallugu KNAPK imatut siunnersuuteqassaaq; inuiaqatigiit aqutaannik akit minnerpaaffeqarlutillu AAMMALI annerpaaffeqarnissaat suliarineqartassasoq. Kingulleq nutaajuvoq. Takorloorparput annerpaaffilernissaat nunarsuarmi qalerallit akiisa niuffassutaanerat aallaavigalugu inissinneqartassasoq. Taamatut iliornikkut suliffeqarfik Royal Greenlanditut ittup ipisitsisinnaanera unitsinneqassaaq.

To top