Aalisarnermut aningaasaliissutissat immikkoortitat

Aalisarnermut aningaasaliissutinut immikkoortitat pillugit Inatsisartut inatsisaat nr. 15, 20. november 2006-imeersoq

Aalisarnermik aningaasaliinernut immikkoortitanik pilersitsineq

§ 1. Inatsisartut inatsisaata siunertaa tassaavoq aalisarnermik inuussutissarsiortut ineriartornerinut siuarsarnerinullu tapiissuteqarnissaq, ilanngullugu inuussutissarsiummi peqataasunut nutaanut isersinnaanerup ajornannginnerulernissaa. Inatsisartut inatsisaat aalisarnermik inuussutissarsiornerup inuiaqatigiinni sapinngisamik annertunerpaamik iluanaaruteqarnissaanut peqataassaaq ilanngullugu aalisarnermi naammassisaqarsinnaassuseq, unammillersinnaassuseq aamma aalisakkanik pisuussutinik aalisarsinnaassutsip ingerlaavartumik naleqqussarsinnaanera pitsaanerulersillugu kiisalu kalaallit nunaanni aalisarnermut iluaqutaasumik nutarsaanerit siuarsarlugit.
Imm. 2. Aalisarnermut aningaasaliissutinut immikkoortitat Aningaasanut inatsimmi immikkoortinneqassapput aamma Aalisarnermut Aningaasaliissutinut Immikkoortitani ileqqaarneqarlutik.

 

Kapitali 2

Inatsisip atuuffia

Ingerlaavartumik taarsersuinernut nutarterinernullu tapiissutit

§ 2. Naalakkersuisut sinerissami qanittumi aalisariutit teknikkikkut pisoqaassutsikkullu ajorsiartornerat malillugu ingerlaavartumik taarsersornerannut nutarternerannullu tapiissuteqarsinnaapput.
Imm. 2. Taamaallaat tapiissuteqartoqarsinnaavoq angallatinik nutaanik atornikunillu pisinernut inuussutissarsiornermi atorneqarsinnaasutut akuerisaasunut aammalu siunissami sivisunerusumi aalisarsinnaalluassuseq ingerlatiinnarumallugu aalisarsinnaalluartutut nutaaliaasutullu nalilerneqartunut.
Imm. 3. Imm. 1 malillugu sinerissap qanittuani aalisarnermi aalisariutinik ingerlaavartumik taarsersuinermi nutarterinermilu ilaapput teknikkikkut atortut, sillimaniarnermi atortut, teknikkikkut atortut allat, aalisarnermi atortut atortullu tamakku assigisaat, suliniullu piviusun-ngortinniarlugu teknikkikkut aningaasatigullu pisariaqartumik siunnersorneqarneq.

 

Suliniutinut nutarterisunut tapiissutit

§ 3. Kalaallit Nunaata aalisarnikkut pisuussutaanik ineriartortitsinermut taakkuninngalu atuinermut iluaqutaasutut nalilerneqartunut ingerlatsinissamut, Naalakkersuisut misiliutigalugu nutaanik suliniutinik pilersitsinernut, misileraalluni aalisarnernut assigisaasaluunniit, naammasssineqarnissaannut tapiissutinik tunniussisinnaapput, uku ilanngullugit:
1) Imartap aalisarnikkut periarfissaanik, immikkut aalisagaqarneranik aamma aalisarnerup allanngortinneqarsinnaaneranik periarfissanik misissuinernut.
2) Aalisarnermi atortunik pitsanngorsaaneq naammassisaqarnerulersitsinerlu, aalisariaatsinik allanik misileraaneq sungiusarnerlu.
3) Ataavartitsiniarluni suliniutinik killilersuinermilu periutsinik misileraanerit, ilanngullugit aalisarnermi atortunik immikkoortiterisinnaasunik qajassuussisinnaasunillu inerisaaneq misileraanerlu.
4) Aningaasaqarnikkut iluanaaruteqarnerup pitsaanerulernissaa siunertaralugu tunisassianik aamma tunisassioriaatsinik pioreersunik inerisaaqqinneq pitsanngorsaanerlu.
5) Aalisakkanik tukertitsivinnik pilersaarusiornissamut misissuinerit ineriartortitsinermilu suliniutit.

 

Kapitali 3
Qinnuteqaatit

Qinnuteqaatit imaat

§ 4. §§ 2 aamma 3 naapertorlugit tapiiffigineqarnissamut qinnuteqaammi suliniummik aallaserisaq ukuninnga imalik ilanngunneqassaaq:
1) Pilersaarutip siunertaanik isumaanillu nalunaarut.
2) Ingerlatsinermi aningaasaqarnermilu missingersuutit tapiiffigitinnissamut pisariaqartinneqartut annertussussiinik nalunaarut.
3) Suliniummi peqataasunik piginnittunillu tamanik nalunaarut.
4) Suliniummik aqutsineq aqutsisullu pisinnaasaannik allaaserinninneq.
5) Suliniutip naammassineqarnissaanut piffissaliussaq.
6) Teknologi, atortut, tunisassiornermi atortut angallallu atorneqartussaq pillugit pingaarnersiorlugit allaaserisaq.
7) Pilersaarummi tunisassianik tunitsiviit aqqutigineqartussat pillugit nalunaarut.

 

Qinnuteqaammi uppernarsaatinut piumasaqaatit

§ 5. §§ 2 aamma 3 naapertorlugit tapiiffigineqarnissamik qinnuteqaammut uppernarsaatit ilanngunneqassapput, taassuma ataani ukununnga uppernarsaatit:
1) Pisassiissutinut, aalisarsinnaanermut akuersissutinut imaluunniit akuersissutinut pisariaqartunut piumasaqaataasoq inatsit una malillugu aningaasatigut tapiiffigineqarnissaq.
2) Avataanit atortitsisartut aningaasaliisinnaanerannik neriorsuut imaluunniit pilersaarutip aningaasartuutitassai tamarmiusut eqqarsaatigalugit §§ 7, imm. 1 aamma § 8 imm. 1 malillugit nammineq aningaasaliisinnaaneq.
3) Suliffeqarfimmik isumaqatigiissutinillu tassunga atasunik piginnittuuneq.
4) Inuussutissarsiornermut pisortaniit taarsigassarsiat.

 

Kapitali 4
Tapiissutinik tunniussineq

§ 6. § 2 malillugu tapiissutinik qinnuteqaatip nalilersornerani, suliniut tamaat isigalugu nalinginnaasumik aningaasatigut angusassatut ilimagineqarsinnaasut allaavigalugit Naalakkersuisut suliniummik naliliissapput.
Imm. 2. § 3 malillugu tapissutinik qinnuteqaatip nalilersornerani, suliniut tamaat isigalugu suliniummi pineqartumi siunissami kalaallit aalisarnermi inuussutissatissarsiorneranni periarfissatut ilimagineqarsinnaasut aallaavigalugit Naalakkersuisut nalilersussapput.
Imm. 3. Naalakkersuisut §§ 2 aamma 3 malillugit tapiissutisinissamik qinnuteqaatit nalilersornerini, ilaatigut qinnuteqartoq siusinnerusukkut tapiissutisisimanersoq, siusinnerusukkut tapiissutisinermi piumasaqaatinik sumiginnaasimanersoq, imaluunniit pisortanit inuussutissarsiutinut taarsigassarsianik sumiginnaasimanersoq pingaarutilittut nalilersinnaavaat.

§ 7. § 2 malillugu Naalakkersuisut ukununnga tapiisinnaapput:
1) Raajarniarnermi pisinermi nalingata tamarmiusup 10%-ia tikillugu.
2) Raajat saniatigut aalisarnerni allani pisinermi nalingata tamarmiusup 20%-ia tikillugu.
Imm. 2 Imm.1 malillugu pisinermi nalinganut tamarmiusumut ilaapput:
1) Angallat teknikkikkut pisariaqartunik ikkussuiffigineqarsimasoq.
2) Isumannaallisaanermi atortut.
3) Teknikkikkut ikkussukkat allat.
4) Aalisarnermi atortut assigisaallu ingerlatsinermut atortut allat.
5) Suliniutip naammassineqarnissaanut teknikkikkut aningaasaqarnikkullu siunnersuinerit pisariaqartut.
Imm. 3. Imm. 1 apeqqutaatinnagu Qaanaamut, Ittoqqortoormiinut aamma Ammassallip kommuniinut tapiissutit annertussusissaat aamma tapiissuteqarnissami piumasaqaatit pillugit immikkut ittunik Naalakkersuisut malittarisassaliorsinnaapput.

§ 8. § 3 malillugu suliniutinut nutarterisunut Naalakkersuisut tapiisinnaapput suliniummi aningaasartuutit 50%-ii tikillugit.
Imm. 2. Imm. 1 malillugu suliniummi aningaasartuutinut ilaapput:
1) Misissuinerit.
2) Pisiat, kisiannili tassunga ilaanatik angallatit, illut atortullu aalajangersukkat allat.
3) Teknikkikkut, aningaasatigut biologinillu siunnersorneqarnerit.

 

Nammineq aningaasaliissutit

§ 9. Naalakkersuisut tapiisinnaapput piumasaralugu qinnuteqartup nammineq aningaasaliissutini uppernarsassagai.
Imm. 2. Nammineq aningaasaliissutitut isigineqarput:
1) Aningaasat tigoriaannaat.
2) Pigisat § 7, imm. 2 malillugu pisianut tamarmiusunut ilaasut.
3) Pigisat § 8, imm. 2, nr. 2 malillugu suliniummi aningaasartuutinut ilaasut.

 

Tuniseqqinnermi piumasaqaateqarneq

§ 10. Naalakkersuisut tapiissuteqarsinnaapput piumasaralugu angallat imaluunniit suliniummi pigisat angallatip imaluunniit suliniummi pigisat tunniunneqareerneranniit ukiuni qulini siullerni tunineqannginnissaat. Naalakkersuisut qinnuteqartoqareerneratigut tapiissutit utertillugit akilerneqareernerisigut tunisinissaq akuerisinnaavaat.
Imm. 2. Kisiannili Naalakkersuisut akuersissutigisinnaavaat tapiiffigineqartup angallat suliniummilu pigisat tunisinnaagai, piginnittoq nutaaq § 4 malillugu tapiiffigineqarnissamut piumasaqaatit naammassippagit suliniummillu allaaserinninnermik nassiussippat aamma § 5 malillugu uppernarsaatinik nassiussippat.
Imm. 3. Imm. 2 malillugu angallammik suliniummilu pigisanik tunisinermi tapiinermi piumasaqaatit allanngortinnagit ingerlaqqissapput. Tapiinermi piumasaqaatit piginnittup nutaap akuerissavai.

 

Uppernarsaaneq

§ 11. Naalakkersuisut tapiissutinik tigusisoq uppernarsaatinik tunniussinissamik piumasaqaateqarfigisinnaavaat, taassuma ataani ukununnga uppernarsaatit:
1) Suliniummi aningaasaqarneq, taassuma ataani aningaasartuutit suut suliniutip piviusun-ngortinnerani aningaasartuutaasimanersut.
2) Suliniummi tunisassianit aningaasat isertitat.
3) Tuniseqqissinnaanermi piumasaqaatit atuutsillugit ukiumoortumik naatsorsuutit.

 

Kapitali 5
Tapiissutinik utertitsilluni akiliineq

§ 12. Tapiissutit utertillugit akilerneqarnissaannik Naalakkersuisut piumasaqarsinnaapput, ukuninnga pisoqarpat:
1) Tapiissutinik tigusisoq qinnuteqarnermini pingaarutilinnik eqqunngitsunik paasissutissiisimappat.
2) Tapiissutinik tigusisoq § 11 malillugu peqqussutinik nalunaarutigineqartunik malinnin-ngippat.
3) Tapiissutinik tigusisoq suliniutip ingerlanneqarnerani piviusunngortinneqarneranilu aammalu suliffeqarfimmik pitsaasumik ingerlatsinermi atuuttunik annertuumik sumiginnaappat.
4) Tapiissutinik tigusisoq tapiinermi piumasaqaatinik atugassaqaritinneqartunillu sumiginnaappat.

§ 13. Tapiissutit utertillugit akilerneqarnissaat Naalakkersuisut piumasarisinnaavaat, imatut pisoqarpat:
1) Tapiissutinik tigusisoq ingasattumik sumiginnaasimaneq pissutigalugu akiliisinnaajunnaartutut nalunaarutigineqarpat.
2) Tapiissutinik tigusisup pilersaarut tuneqqissimappagu.
3) Suliniut tapiiffigineqartoq ingerlatsiveqatigiiffimmit allamit tiguneqarpat imaluunniit piumasaqaatini tunngavigineqartut sinnerlugit pilersaarummut tunngatillugu piginnittuusut annertuumik allanngorpata.
4) Tapiissutinik tigusisoq aalisarsinnaanermut akuersissummi piumasaqaatit imaluunniit aalisarnermi suliniummiluunnniit pisortat akuersinerminni piumasaqaataannik naammassisinnaajunnaarpat. 

 

Kapitali 6
Ataatsimut aalajangersakkat

§ 14. Tapiinermi allaffissornermilu ingerlatsinermut malittarisassanik Naalakkersuisut aalajangersaasinnaapput, taassuma ataani:
1) Suliniutit suut tapiiffigineqarsinnaanersut.
2) Nunap sortaani tapiissuteqartoqarsinnaanersoq.
3) Inuussutissarsiutit immikkoortut suut tapiiffigineqarsinnaanersut.
4) Qinnuteqartumut suliniummullu ilinniagaqarnikkut, aningaasaqarnikkut teknikkikkullu piumasaqaatit.

 

Kapitali 7
Pineqaatissiissutit

§ 15. Ukuninnga pisoqartillugu pillaammik akiliisitsoqarsinnaavoq:
1) Pissutsinik § 12 malillugu tapiissutinik utertitsilluni akiliinissamik kinguneqartumik unioqqutitsineq.
2) Pisortanut salloqittaalluni paasissutissiineq, takuuk § 4.
3) § 11-imi piumasaqaatit aalajangerneqarsimasut sumiginnarneqarsimappata.
Imm. 2. Suliffeqarfik tamakkiisumik ilaannakortumilluunniit naalagaaffimmit, Namminersornerullutik Oqartussanit pigineqartoq, kommune imaluunniit kommunimi ataatsimoorussaq kommunalbestyrelsit aamma nunaqarfinni aqutsisut il.il. pillugit inatsisartut inatsisaasa ataaniittoq, aktieselskabi, anpartsselskabi, andelsselskabi assigisaalluunniit unioqqutitsippata suliffeqarfik assigisaallu pinerlunnermi inatsisit naapertorlugit akisussaatinneqarsinnaavoq. Tamannattaaq atuuppoq Namminersornerullutik Oqartussanit, kommunimit imaluunniit kommunimi ataatsimoorussamit kommunalbestyrelsit aamma nunaqarfinni aqutsisut il.il. pillugit inatsisartut inatsisaasa ataaniittumit unioqqutitsineq iliuuserineqarsimappat.
Imm. 3. Inatsit manna malillugu malitarisassani aalajangersarneqarsinnaavoq malittarisassanik unioqqutitsineq akiliisitsinermik kinguneqarsinnaasoq.
Imm. 4. Malittarisassani Inatsisartut inatsisaat manna malillugu aalajangersarneqartuni suliffeqarfik tamakkiisumik ilaannakortumilluunniit naalagaaffimmit, Namminersornerullutik Oqartussanit pigineqartoq, kommune imaluunniit kommunimi ataatsimoorussaq kommunalbestyrelsit aamma nunaqarfinni aqutsisut il.il. pillugit Inatsisartut inatsisaasa ataaniittoq, aktieselskabi, anpartsselskabi assigisaalluunniit unioqqutitsippata suliffeqarfik assigisaallu unioqqutitsineranni pillaammik akiliisitsinissaq pillugu malittarisassanik aalajangersaasoqarsinnaavoq. Aammattaaq Namminersornerullutik Oqartussat, kommune imaluunniit kommunimi ataatsimoorussaq kommunalbestyrelsit aamma nunaqarfinni aqutsisut il.il. Inatsisartut inatsisaasa ataaniittoq unioqqutsitsisillugit pillaammik akiliisitsinissaq pillugu malittarisassanik aalajangersaasoqarsinnaavoq.

 

Atuutilerfia

§ 16. Inatsisartut inatsisaat ulloq 15. december 2006 atuutilissaaq. 


Namminersornerullutik Oqartussat, ulloq 20. november 2006


Hans Enoksen                                                                                       Finn Karlsen