KL
DA
EN

Pilluaqqussut

Matumuuna Kalaallit Nunaanni Aalisartut Piniartullu Kattuffiat Siulersuisuunerillu sinnerlugit partiip Siumut 12. marts 2013 Inatsisartunut qinersinermi ajugaanerani uummammik pisumik pilluaqquvara.

Ukiuni kingullerni sinerissap qanittuani imaatigut inuusssutissarsiornermi pissutsit ataatsimut isigalugit imaannaasimanngillat. Sineriassuarmilu annertuumi aalisartut piniartullu atukkamikkut ajornartorsiornerat ersarippoq naak piffiit ilaanni pingaartumik qalerallit akii eqqarsaatigalugit ilorraap tungaanut saariartoqarsimagaluartoq.

KNAPK-miit  neriuutigilluinnarparput pingaartumik Nunattta imartaani aalisakkat, piniakkallu takussaalerattuinnarfiisa, aammalu pinngortitap allanngoriartuinnartup, nalaanni, uumassusilinnut aqutsinermi aalisartut piniartullu ilisimasaasa maannamut annertunerusumik Nunatsinni Naalakkersuisunngortussaniit partiiniillu naliliiffigineqarluni pissusissamisut atuutsinneqarnissaa iluarsiivigineqarumaartoq.

Uumasorsiuut ukiorpassuarni atuisunut tassalu aalisartunut piniartunullu naqisiman-ninniarpalaartumik pissusilersortuartarnerat attattuaannarsinnaajunnaarparput, tassami uumasorsiuut oqartaraluarput – sinerissap qanittua tamarmi - aalisakkanik avataani suffinikunik pilersorneqartoq. Assersuutissaqqipporlu ukiorpassuarni aalisakkat assigiinngitsut aamma qalerallit uani pineqartut ilagisaat, tassalu sinerissap qanittuani ilumut suffisartut aatsaat maannakkut Pinngortitaleriffimmiit Uumasorsiuut upperilerluta misissuiffigilermassuk.

Naalakkersuinikkut sutigut tamatigut sulinissinni ajunnginnerpaamik kissaallusi neriuutigaarput Aalisarnermut Piniarnermullu Naalakkersuisunngortussaq sinnerissap qanittuani aalisartut piniartullu illersorlugit sulilluarumaartoq.

KNAPK-miit suleqataalluarnissarput Naalakkersuisunngortussallu suleqatigilluarnissaat qularutiginngilluinnarparput.

Kalaallit Nunaanni Aalisartut Piniartullu Kattuffiat sinnerlugu

Ikinngutinnersumik inuulluaqqusillunga

Leif Fontaine, siulittaasoq.