KL
DA
EN

Nannunniat 2012-imi januaarip ulluisa aallaqqaataaniit nannuttamik oqaanit kigutaanillu misiligutissanik tigusisalernissaat Naalakkersuisunut ilaasortap Ane Hansenip aalajangerpaa. Misiligutissat nanoqatigiinnik (pissuseqatigiinnik) Canadamik Nunavummilu avitseqatigiissutitsinnut tunngasumik isumaqatigiissimaneq aallaavigalugu nannunniarnerup aqunneqarnissaanut malitsitsiniaanermut pingaarutilerujussuupput. Tamatumani siunissami nanoqatigiinnik piujuaannartitsinissaq nungusaataanngitsumillu piniarneqarnissaasa qulakkeerneqarnissaat siunertarineqarpoq.

Kigutaanit tiguneqartukkut takuneqarsinnaassaaq nannup utoqqaassusia aammalu nanoqatigiiaat agguaqatigiissillugu ukiukkuutaartumik “peqqissusiat” takuneqarsinnaassalluni. Oqqamit misiligutit DNA-vi misissueqqissaariffigineqassapput, taamaalillutik nanoqatigiikkuutaat qanoq imminnut attuumassuteqarnersut ilisimatusartut paasisinnaaniassammassuk. Misiligutit Baffinip Kangerliumanersuani Kane Basinimilu nannut, Nunavummik avitseqatigiiffigisatta amerlassusilerniarneqarneranni nalilersuinermut iluaqutaassapput.

Misiligutissanut puussat quppersakkallu ilitsersuutitallit Pinngortitaleriffimmit nassiussuunneqarput. Quppersagaq aamma uannga aaneqarsinnaavoq: www.natur.gl. Kommunini inuussutissarsiutinut siunnersortit quppersakkamik paasissutissanik imalimmik aamma misiligutissat puussaannik aallerfigineqarsinnaapput.

Misiligutissat, immikkullu immersugassartaasa assilineqarnerat (kopi) ilanngullugu kommunemut tunniunneqassapput, tassanngaanniik Pinngortitaleriffimmut nassiunneqassallutik.

Namminersorlutik Oqartussani Aalisarnermut, Piniarnermut Nunalerinermullu Naalakkersuisoqarfimmiit Pinngortitaleriffimmiillu ikiuukkusunninnut qujavugut, kajumissaarutigiumallugulu www.natur.gl-imi suliamut tunngatillugu paasisaqarnerorusuttunut aalleqqulluta.

Paasissutissanik amerlanerusunik pissarsiniaraanni saaffigineqartussat:
Ilisimatusartoq, Malene Simon, Pinngortitaleriffik. Oqarasuaat 36 12 50 e-mail: masi@natur.gl imaluunniit
Allaffimmi pisortaq, Amalie Jessen, Aalisarnermut, Piniarnermut Nunalerinermullu Naalakkersuisoqarfik. Oqarasuaat 34 53 04, e-mail amalie@remove-this.nanoq.gl