KL
DA
EN

KNAPK pisortartaarpoq

Kalaallit Nunaanni Aalisartut Piniartullu Kattuffiat KNAPK piffissami november-imiit januar-i ilanngullugu pisortaqanngereerluni februar-ip 1-ani 2012 pisortartaarpoq.

KNAPK-mi Ulluinnarni Aqutsisut januarimi ataatsimiinnerminni aalajangerput Petrus H. Biilmann Nuummeersoq KNAPK-mi pisortatut atorfinitsinneqassasoq. Petrus H. Biilmann 1954-mi Maniitsumi inuuvoq, nuliaraa Charlotte J. Biilmann, pingasunillu meeraqarlutik.

1975-mi naammassisaminik Ikast Handelsskolemi HXR ingerlassimavaa. Maniitsumi Niuertussatut allaffimmi sulivoq 1979-imi Nuummi Handelsinspektorat-imi umiarsuarsuit sinerissami angalanerinut pilersaarusiortartutut Ilanngaaserisutullu sulilernissami tungaanut. 1982-miit 1984-ip qeqqata tungaanut Sisimiuni Niuertussaanertut umiarsualiviup allaffeqarfiani sulivoq.

Petrusi 1984-imiilli aalisarnermut tunngasunik ataavartumik suliaqalerpoq, tassa Nuuk Trawl A/S-ip pisortatut aqutsisoraa Sisimiuni 1992-ip qeqqata tungaanut, Namminersornerullutik Oqartussat Aalisarnermut Pisortaqarfiani allaffimmi pisortanngornissami tungaanut. 1997-imiit 1999 ilanngullugu Avataasiutit Piginneqatigiiffiisa Kattuffiani APK-mi pisortaavoq. 2000-imiilli Polar Seafood A/S-ip ataani ingerlatsivinni ilaatigut pisortaalluni, kiisalu sinerissamut qanittumi aalisartunut tunitsivinnullu piginnittut sinnerlugu sullissisuulluni.

Taamaattumik KNAPK-p iluani suliassat maanna akisussaaffigilikkani qanimut aamma ilisimaarilluarlugit. November-ip 1-aniit februar-ip 1-ata tungaanut Kattuffimmi ineriartortitsinermut siunnersortitut atorfeqarpoq.

KNAPK-mi Siulersuisuunerit sulisullu Petrus H. Biilmann allaffeqarfimmut tikilluaqquaat suleqatigilluarnissaalu qilanaaralugu.