KL
DA
EN

2013-mut arfernut angisuunut pisassiissutit qanoq inissisimappat?

Tamatta nalunngisatsituut ukiormanna 2012-mi Panama-mi Nunarsuarmi Arfanniarnermut Ataatsimiititaliarsuup, IWC-iip, ataatsimmersuarnerani ukiunut tulliuttunut Nunatta arfernik pisassanik piumasaqarnera itigartitsissutigineqarpoq.

 

Taamaakkaluartoq Nunatta ukiuni tulliuttuni arfattassaminik kissaateqarnermini tunngavilersuutai tamakkiisumik isumaqatigalugillu illersoratsigit Kalaallit Nunaanni Aalisartut Piniartullu Kattuffiata tungaaniit erseqqissaatigissavarput.

 

KNAPK-mi ilisimalluinnarparput Nunatta ukiuni tulliuttuni arfattassinneqarnissaminut IWC-mi maleruagassat ilisimatuussutsikkullu piumasaqaatit naammassisimagai.

Isumaqarluinnarpugullu Nunatta ukiuni untritilippassuanngortuni maannamut arfanniartutut inissisimanera tamanit ataqqineqartariaqartoq, aamma danskit nunarsuarmioqatigiillu tungaanniit.

 

Kalaallit Nunaanni Nunaanni Aalisartut Piniartullu Kattuffiat ukiorpanngortuni Nunarsuarmi Arfanniarnermi Ataatsimiitsimiititaliarsuup, International Whaling Commission-ip ataatsimeersuartarnerani peqataasarsimavoq danskit naalagaaffiata aallartitaanut ilaasortatut inissisimanini tunngavigalugu. Tamannalu soorunami nuannaarutigaarput minnerunngitsumillu oqartussaaqataanermik tassuunakkut misiginerput qujassutigaarput.

 

KNAPK-miilli pisuni kingullerni maluginiarparput pisortatigoortumik IWC-mi danskit aallartitaannik suleqateqarneq ilungersunarsiartortoq qularnanngitsumik aamma danskit Inatsisartuini Nunarput uparuartorneqartarmat Nunatta arfanniarnermut tunngassuteqartunik suliniuteqartarneranut ajoqutaaqisumik.

KNAPK-milu qularinngilarput danskit naalagaaffiata EU-mut ilaasortaanini tunngavigalugu Bruxelles-miit apeqqummut tassunga tunngatillugu sunnerniarneqarnera danskit pisortatigoortumik Nunatsinnut illuatungiliuppalaartumik pissusilersulernerannut pissutaaqataasimassasoq. Ilisimaaraarpullu Nunatsinni arfanniat sinnerlugit IWC-p ataatsimiinnerani aallartitanut peqataasarnerput allaat danskit tungaaniit apeqqusersorneqalersoq. Pissutsit taamaattut akuersaarsinnaanngilluinnarpavut.

 

KNAPK-mi isumaqarpugut pisuussutinik uumassusilinnik sumiluunniit uanilu pineqartumi arfernut tunngatillugu aqutsinermi sulinermilu atuisut oqartussaaqataanerat tunngaviulluinnartariaqartoq, inuppalaassutsimillu akaarinneqatigiinnermillu aallaaveqarnerusumik inuiaqatigiit, naalakkersuinermik suliallit nunarsuarmioqatigiillu akornanni aamma tunngavissinneqarnissaa paaseqatigiissutigineqarnissaalu maannamut annertunerusumik susassaqaqatigiit akornanni sulissutigineqartariaqartoq.

 

Inuiaqatigiinnut tamanut, naalakkersuinermik sulialinnut nunarsuarmiunullu KNAPK-miit eqqaamaqquarput Inuttut Pisinnaatitaaffiit ILO-konvension 169, aammalu Nunat Inoqqaavisa Pisinnaatitaaffii Pillugit Naalagaaffiit Peqatigiit Nalunaarutaat, malillugit Nunatsinni sinerissap qanittuani aalisartut piniartullu nunat inoqqaavisut  kiffaanngissuseqartumik aningaasarsiornikkut inuussutissarsiornikkullu piniaatsimik suliffitillu atorsinnaanissaat ineriartortinnissaallu attatissallugit qularnaassallugu pisinnaatitaaffigimmassuk.

 

Taamaattumik Kalaallit Nunaanni Aalisartut Piniartullu Kattuffiata Nunatsinni piniartut arfernik pisassaqartuarnissaat pingaartillugu apeqqutigissavaa ukioq 2013 qanillilluinnarmat ukiullu nutaap aallartinneraniit arferit angisuut ilaat piniagaanerat aallartittussaammat ukiumut 2013-mut arfattassanik pisassiissutissat qanoq inissimanersut?

 

Nunatsinni arferup neqaanik iluaquteqarniarnitta atorluaaniarnittalu ineriartortinnissaa KNAPK-miit tapersersorluinnaratsigu erseqqissaatigissavarput. Tamatumalu suleqatigiissutiginissaanut piareersimanerput ilanngullugu erseqqissaatigalugu.

 

Inussiarnersumik inuulluaqqusillunga

Kalaallit Nunaanni Aalisartut Piniartullu Kattuffiat sinnerlugu

 

Leif Fontaine

Siulittaasoq