KL
DA
EN

2011-mi nuna tamakkerlugu ukiumoortumik qilalugarniarneq 1. februar 2011 aallartissaaq

Namminersorlutik Oqartussanit

Qilalukkanik qaqortanik qernertanillu illersuineq piniarnerlu pillugit Namminersornerullutik Oqartussat nalunaarutaat nr. 2, 12. februar 2004-meersup nutarterneranut atatillugu ukiumoortumik pisassiinerup piffissaa maanna 1. juli-miit 30. juniusoq allanngortinneqassaaq 1. januarimiit 31. decembarimut, taamaasilluni ukiumut qaammatisiutit malilerlugit. Nalunaarut nutartigaq suli Naalakkersuisuni akuerineqanngimmat aammalu ilisimatitsissutigineqaqqaassammat, immikkut ittumik 2011-mi pisassiissutit ukiuat 1. februar 2011 aallartissaaq 31. december 2011 naalluni.

Maluginiarneqassaaq maannakkut pisassiissutaasut 28. januar 2011-p tungaanut atuutissammata, taassumalu kingorna 2010 ilanngullugu pisaasimasut kiseqqissaarneqassammata 2011-mullu pisassiissutinik nalimmassaasoqarsinnaalluni.

Naalakkersuisut 2009-mi ukiunut pingasunut pisassiissutissat aqunneqarnissaannik pilersaarut ukiunut 2009/2010, 2010/2011 aamma 2011/2012-mut akuersissutigaat. Tamannalu tunngavigalugu Naalakkersuisut ukiumi qilalugarniarfiusumi 1. juli 2010 – 30. juni 2011-mi pisassiissutissat aalajangerpaat. Pisassiissutinik aalajangiinermi nunanut allanut isumaqatigiissutit, biolog-it siunnersuineri, atuisut ilisimasaat aammalu Piniarneq pillugu Siunnersuisoqatigiit tusarniarneqarnerat sianigineqartussaapput.

Nunatta Kitaani 2011-mi qaqortartassat 310-sapput aamma qernertartassat 310-ssallutik. Tunumi ukiunut pingasunut pisassiissutissatut pilersaarutit ukiumut qernertartassat 85-t taamatuttaaq nikisinneqanngillat. Ukiunut pingasunut pilersaarutip pitsaaqutigaa iluaqutaasussaagami nunanut allanut eqqussinermi annissinermilu piujuartitsinissamik tunngaveqarani pisassiisarnikkut CITES-ip EU-llu ataani killilersuinerit (annertunerusumik killilersuilersinnaanerit) ilimanaataat millisissagamikku kiisalu piniartunik pisarisinnaasanut tunngatillugu piniarnerminnik naleqqussaanissaannut.

Pisassiissutit amerlassusaat siunnersuineq kingusinnerpaaq, tunngavigineqarpoq, taannalu pissarsiarineqarpoq Kalaallit/Canadamiut qilalukkat qaqortat qernertallu pillugit ataatsimoorullugu kommissioniannit, Commission on Conservation and Management of Beluga and Narwhal (JCNB. Pisassiissutissatut aalajangikkat 70 %-imik ilimanaateqalersitsissapput qaqortat qernertallu 2009-miit 2014-i ilanngullugu amerliartornissaannik. Pisassiisarneq pillugu suleqatigiissitat tusarniareerlugit nunap immikkoortuani ukiumut pisassat agguarneqarnissaat tusagassiutitigut nalunaarutigineqarumaarpoq.

Piniarnissamut piumasaqaatit nutaat www.lovgivning.gl –mi takuneqarsinnaalissapput nalunaarut akuersissutigineqareerpat.

 

Paasisaqaqqikkusukkuit, uunga attaveqarit:

Allaffimmi pisortaq Amalie Jessen, tlf: 34 53 04, email: amalie@remove-this.nanoq.gl